253-берене. КНС төлөөчү
Булагы: КР Юстиция министрлигинин мыйзам актыларынын базасы
Жаңыртылды: 06.11.2026
IX БӨЛҮМ. КОШУМЧА НАРК САЛЫГЫ›35-глава. Жалпы жоболор
Кыргыз Республикасынын Салык кодексинин 253-беренеси, 06.08.2026 редакциясы.
1. КНС төлөөчү болуп төмөнкүлөр таанылат:
1) эгерде бул беренеде башкасы каралбаса, жалпы салык режимине ылайык салыктарды төлөөчү же иши салык салынууга тийиш болгон салык төлөөчү;
2) салык салынуучу импортту жүзөгө ашырган субъект;
3) берүү орду Кыргыз Республикасынын аймагы деп таанылган, жумуш аткаруучу же кызмат көрсөтүүчү, ошондой эле сатып алуучуларга (жеке жактарга - Кыргыз Республикасынын резиденттерине) товарларды электрондук сатууну жүзөгө ашыруучу чет өлкөлүк субъект. Ушул Кодекстин 53-беренесинин 2-бөлүгүнүн 5-пунктунда көрсөтүлгөн чет өлкөлүк субъекттин КНС боюнча милдеттенмесин салык агенти аткарат.
2. Төмөнкүлөр КНС төлөөчү болуп саналбайт:
1) ушул Кодекстин талаптарына ылайык айыл чарба өндүрүүчүсү, айыл чарба кооперативи жана машина-трактордук станция деп таанылуучу уюм же жеке адам;
2) ушул Кодекске ылайык салык салынуучу берүүлөрдү жүзөгө ашырбоочу коммерциялык эмес уюм.
(КР 2023-жылдын 3-апрелиндеги № 78, 2024-жылдын 23-июлундагы № 136 , 2025-жылдын 29-октябрындагы № 243, 2026-жылдын 6-августундагы № 145 Мыйзамдарынын редакцияларына ылайык)