419-берене. Салык төлөөчү

1. Салык төлөөчү болуп төмөнкүлөр саналат:

1) Кыргыз Республикасында туруктуу мекеменин белгилери жок чет өлкөлүк уюмду кошпогондо, жеке ишкер же уюм;

2) ушул Кодекстин 324-беренесинде белгиленген режимди колдонгон субъект;

3) ушул Кодекстин 430-беренесинин 51-бөлүгүндө көрсөтүлгөн иштерге карата ушул Кодекстин 324-беренесинде белгиленген режимди колдонуучу ЭЭЗ субъектиси;

4) Кыргыз Республикасынын аймагынан тышкары иш жүргүзүүчү субъект, мындай иш агенттик келишимдин негизинде жана электрондук соода аянтчасы аркылуу жүргүзүлүүчү учурларды кошпогондо.

Ушул главанын максаттарында Кыргыз Республикасынын аймагынан тышкары иш деп жүргүзүү орду Кыргыз Республикасынын аймагынын чегинен тышкары жайгашкан товарларды сатуу боюнча иш, ошондой эле бул товарларды сатуу менен байланышкан коштоочу жумуштарды жана/же кызмат көрсөтүүлөрдү аткаруу түшүнүлөт.

Ушул пункттун максатында товарлар деп Кыргыз Республикасынын Мамлекеттик чек арасынан өтпөгөн товарлар түшүнүлөт.

2. Бирдиктүү салыктын негизинде салык салуунун жөнөкөй-лөтүлгөн тутуму төмөнкүлөргө жайылтылбайт:

1) жаппы салык режими жана башка атайын салык режимдери боюнча салык төлөөчү субъект;

2) камсыздандыруу кызматтарын көрсөткөн банкка жана субъектке;

3) инвестициялык фондго;

4) баалуу кагаздар рыногунун кесипкөй катышуучусуна;

5) ТЭИ ТН 2202 товардык позициясында классификациялануучу алкоголсуз суусундуктарды чыгаруучу жана чекене сатып өткөрүүнү жүзөгө ашыруучу коомдук тамактануу субъектин кошпогондо, акциздик салыктын салык төлөөчүсүнө;

6) алтын, күмүш, жез, сурьма, сымап, вольфрам, калай, ошондой эле алтын эритмесин жана аффинаждалган алтынды, күмүштүн, жездин, сурьманын, сымаптын, вольфрамдын жана калайдын даяр продукциясын камтыган кендерди жана концентраттарды казып алуу жана сатып өткөрүү боюнча ишти жүзөгө ашыруучу субъектке;

7) (Кыргыз Республикасынын 2023-жылдын 3-апрелиндеги № 78 Мыйзамына ылайык күчүн жоготту)

8) уюлдук байланыш жана интернет байланышы чөйрөсүндө иш жүргүзүүчү субъектке;

9) жылуулук энергиясын, электр энергиясын жана газ берүүчү субъектке.

3. Ушул берененин 1-бөлүгүнүн 4-пунктунда көрсөтүлгөн субъекттер товарларды сатуу, жумуштарды аткаруу, кызматтарды көрсөтүү боюнча башка иштин түрлөрүн жүзөгө ашырууга укугу жок.

(Кыргыз Республикасынын 2023-жылдын 3-апрелиндеги № 78, 2024-жылдын 2-февралындагы № 31, 2025-жылдын 12-февралындагы № 37, 2025-жылдын 31-июлундагы № 185, 2025-жылдын 31-декабрындагы № 262, 2026-жылдын 6-августундагы № 145 Мыйзамдарынын редакцияларына ылайык)