412-берене. Жергиликтүү өз алдынча башкаруу органдарынын укуктары
Булагы: КР Юстиция министрлигинин мыйзам актыларынын базасы
Жаңыртылды: 06.11.2026
XIII БӨЛҮМ. МҮЛК САЛЫГЫ›55-глава. Мүлк салыгы боюнча жеңилдиктер жана бошотуу
Кыргыз Республикасынын Салык кодексинин 412-беренеси, 06.08.2026 редакциясы.
Жергиликтүү кеңештер ведомстволук аймакта төмөнкүлөргө укуктуу:
1) төмөнкүлөрдү берүүгө:
а) салык төлөөчү ал жеткис күчтүн кесепетинен материалдык зыян тарткан учурларда имараттарга жана жайларга мүлк салыгын төлөөдөн 3 жылга чейинки мөөнөткө толук же жарым-жартылай бошотуу;
б) жерди пайдалануучу ал жеткис күчтүн кесепетинен материалдык зыян тарткан учурларда айыл чарба багытындагы жерлерге мүлк салыгын төлөөдөн 3 жылга чейинки мөөнөткө толук же жарым-жартылай бошотуу;
в) иши ушул Кодекстин 183-беренесинин 1-бөлүгүндө белгиленген жеңилдетилген салык салууга тийиш болгон иштин түрлөрүнө кирген ишканалар үчүн имараттарга, курулмаларга жана жайларга мүлк салыгын жана/же калктуу конуштардын жерлерине жана айыл чарба багытындагы эмес жерлерге мүлк салыгын төлөөдөн толук бошотуу;
г) чек арага чектеш преференциалдык калктуу конуштарда катталган жана ишин жүзөгө ашырган салык төлөөчүлөр үчүн жер участокторуна жана турак эмес имараттарга, курулмаларга жана жайларга мүлк салыгын төлөөдөн толук бошотуу.
2) топурактын бонитетинин баллын эске алуу менен айыл чарба жерлерине кирген жер участоктору үчүн, ошондой эле ал жеткис күчтүн учурларын кошпогондо, пайдаланылбаган айыл чарба жерлери үчүн учурдагы салыктык мезгилдин 1-октябрынан кечиктирбестен кийинки салыктык мезгилдерге базалык салыктык наркты көбөйтүү.
(КР 2025-жылдын 12-февралындагы № 37 Мыйзамынын редакциясына ылайык)