316-берене. Эсепке алууга жатпаган сатылып алынган материалдык ресурстар үчүн КНС

1. Сатып алынган материалдык ресурстар үчүн КНС төмөнкү учурларда сатып алынган материалдык ресурстарга карата эсепке алууга жатпайт:

1) салык салынуучу берүүлөрдү түзүүгө эмес;

2) геологиялык издөө жана геологиялык чалгындоо иштери үчүн тийиштүү лицензиянын жарактуулук мөөнөтүнүн ичинде;

3) оюн-зоок жана бош убакыт чөйрөсүндө ишкердик ишти жүзөгө ашыруу үчүн КНС төлөөчү тарабынан сатылып алынгандарды кошпогондо, эс алууну, оюн-зоокту уюштуруу максатында.

2. Сатылып алынган материалдык ресурстар үчүн КНС төмөнкү учурларда эсепке алууга жатпайт:

1) эгерде мындай КНС ушул Кодекстин жоболорун бузуу менен эсепке алынса;

2) табигый азаюу ченеминен ашкан жоготулган материалдык ресурстар боюнча;

3) жараксыз эсеп-фактура боюнча;

4) бардык милдеттүү реквизиттери толтурулбаган эсеп-фактура боюнча;

5) импорттолуучу материалдык ресурстардын фактуралык наркына транспорттук чыгымдарды, камсыздандырууну, акциз салыгын, бажы төлөмдөрүн эске алуу менен кошуп эсептелүүчү КНСтин суммасынан бажы иши чөйрөсүндөгү Кыргыз Республикасынын мыйзамдарына ылайык аныкталуучу наркка кошуп эсептелген КНСтин ашыкча суммасына.

6) акциз салыгын эске алуу менен импорттолуучу материалдык ресурстардын фактуралык наркына кошуп эсептелүүчү КНСтин суммасынан Кыргыз Республикасынын салык мыйзамдарына ылайык аныкталуучу наркка кошуп эсептелген КНСтин ашыкча суммасына.

Эгер ушул Кодексте башкача каралбаса, фактуралык нарк - эсеп-фактурасында же инвойсто көрсөтүлгөн товардын наркы.

3. Эсепке алынууга жатпаган сатып алынган материалдык ресурстар үчүн КНС ушул берененин 2-бөлүгүнүн 1, 4 жана 5-пункттарында көрсөтүлгөн учурларды кошпогондо материалдык ресурстардын эсептик наркына киргизилет.

4. Эгерде КНС төлөөчү ушул Кодекстин 324-беренесинде белгиленген режимди колдонсо, сатып алынган материалдык ресурстар үчүн КНС эсепке алынууга жатпайт.

5. Кыргыз Республикасынын аймагында накталай түрдө жана/же товар алмашуу (бартердик) операциясы боюнча сатып алынган материалдык ресурстар үчүн КНС эсепке алынбайт.

(Кыргыз Республикасынын 2023-жылдын 3-апрелиндеги № 78, 2024-жылдын 2-февралындагы № 31, 2025-жылдын 31-июлундагы № 185, 2026-жылдын 6-августундагы № 145 Мыйзамдарынын редакцияларына ылайык)