287-берене. Коммерциялык эмес уюмдар жүзөгө ашыруучу берүүлөр
Булагы: КР Юстиция министрлигинин мыйзам актыларынын базасы
Жаңыртылды: 06.11.2026
IX БӨЛҮМ. КОШУМЧА НАРК САЛЫГЫ›38-глава. Бошотулган берүүлөр жана КНС нөлдүк ставкасы менен берүүлөр
Кыргыз Республикасынын Салык кодексинин 287-беренеси, 06.08.2026 редакциясы.
1. Коммерциялык эмес уюмдар жүзөгө ашыруучу берүүлөрү КНС бошотулган берүүлөр болуп саналат, эгерде бул берүүлөр:
1) эмгекке жарамсыз жарандардын, аз камсыз болгон үй-бүлөлөрдүн, балдар үйлөрүнүн жана карылар үйлөрүнүн дарегине, социалдык жактан камсыз кылуу жана коргоо үчүн болсо;
2) билим берүү, экология, саламаттык сактоо, илим, маданият жана спорт чөйрөсү үчүн болсо.
3) мамлекеттик органдардын жана жергиликтүү өз алдынча башкаруу органдарынын жана/же алардын уюмдары үчүн болсо.
4) юридикалык жактардын бирикмелеринин, иш берүүчүлөрдүн бирикмелеринин, коомдук бирикмелердин өз мүчөлөрүнүн жана/же катышуучуларынын дарегине консультациялык-укуктук кызмат көрсөтүүлөрү болсо;
5) көп батирлүү үйдүн жашоочуларынын жалпы үлүштүк менчиги болуп саналган мүлктү турак жай менчик ээлеринин шериктиктери тарабынан ижарага берүү боюнча болсо.
2. Ушул берененин 1-бөлүгүндө көрсөтүлгөн берүүлөрдү кошпогондо, коммерциялык эмес уюм тарабынан жүзөгө ашырылуучу берүүлөргө ушул бөлүмгө ылайык КНС салынат.
(Кыргыз Республикасынын 2023-жылдын 3-апрелиндеги № 78, 2024-жылдын 2-февралындагы № 31, 2025-жылдын 12-февралындагы № 37 Мыйзамдарынын редакцияларына ылайык)