171-берене. Даттануу берүүнүн натыйжалары
Булагы: КР Юстиция министрлигинин мыйзам актыларынын базасы
Жаңыртылды: 06.11.2026
VI БӨЛҮМ. САЛЫК КЫЗМАТЫНЫН ОРГАНДАРЫНЫН ЧЕЧИМДЕРИНЕ, АЛАРДЫН КЫЗМАТ АДАМДАРЫНЫН АРАКЕТТЕРИНЕ ЖАНА/ЖЕ АРАКЕТСИЗДИГИНЕ ДАТТАНУУ›20-глава. Салык кызматынын органдарынын чечимдерине жана аракеттерине даттануунун тартиби
Кыргыз Республикасынын Салык кодексинин 171-беренеси, 06.08.2026 редакциясы.
1. Салык төлөөчүнүн ушул Кодексте белгиленген тартипте ыйгарым укуктуу салык органына же сотко даттанууну берүүсү даттанылган чечимдин аткарылышын токтото турат.
2. Чечимди аткаруу ыйгарым укуктуу салык органына даттануу берилген күндөн тартып ыйгарым укуктуу салык органынын чечимине соттук тартипте даттануу үчүн процессуалдык мыйзамдарда белгиленген мөөнөт аяктаганга чейин, ал эми чечимди соттук тартипте даттанууда соттун чечими күчүнө киргенге чейин токтотула турат.
3. Салык төлөөчүнүн даттануусун толук же жарым-жартылай канааттандырган учурда, салык кызматынын органынын чечимине даттануу боюнча чечимдин негизинде тиешелүү өзгөртүүлөр жана толуктоолор киргизилет.
4. Салык төлөөчүнүн даттануусу канааттандырылган же жарым-жартылай канааттандырылган учурда, салык санкциялары жана туум даттануу каралган бүткүл мезгил үчүн негиздүү эсептелди деп таанылган суммага гана эсептелет.
5. Эгерде салык төлөөчүнүн даттануусу боюнча чечим кабыл алынгандан кийин ыйгарым укуктуу салык органынын чечимин чыгарууда эске алынбаган жана салык төлөөчүнүн салык милдеттенмесин өзгөртүүгө алып келген документтик маалыматтар алынса, анда ыйгарым укуктуу салык органы бул чечимди салык төлөөчүнүн даттануусу боюнча ыйгарым укуктуу салык органынын чечимин салык төлөөчүгө тапшырган күндөн кийинки күндөн тартып бир жылдын ичинде өзгөртүүгө укуктуу.
(КР 2023-жылдын 3-апрелиндеги № 78, 2025-жылдын 31-июлундагы № 185 Мыйзамдарынын редакцияларына ылайык)