120-берене. Көчмө текшерүүгө жазма буйрук

1. Көчмө текшерүү жүргүзүү үчүн салык органынын жетекчиси төмөнкүдөй реквизиттерди камтыган белгиленген формадагы жазма буйрукка кол коет:

1) салык органында жазма буйрук катталган дата жана номер;

2) текшерүү жүргүзө турган салык органынын аталышы;

3) салык төлөөчүнүн толук аталышы;

4) салык төлөөчүнүн ИСН;

5) текшерүүнүн (контролдун) түрү;

6) текшерүүнүн негизи;

7) текшерүүнүн предмети;

8) ушул Кодекске ылайык текшерүү жүргүзүүгө тартылган текшерүүчү адамдардын кызмат орундары, аты-жөнү;

9) текшерүү жүргүзүү мөөнөтү;

10) текшерилүүчү салыктык мезгил;

11) текшерүүнү дайындоо жөнүндө салык органынын чечиминин реквизиттери.

2. Жазма буйруктун формасын ыйгарым укуктуу салык органы белгилейт.

3. Жазма буйрукка салык органынын жетекчиси же салык органынын жетекчиси ыйгарым укук берген адам кол коюшу керек, ал гербдүү мөөр менен күбөлөндүрүлүүгө жана ыйгарым укуктуу салык органы тарабынан белгиленген тартипте катталууга тийиш.

4. Көчмө текшерүүнүн мөөнөтү узартылган учурда кошумча жазма буйрук таризделип, анда мурдагы жазма буйрук катталган номер, дата жана көчмө текшерүүнүн мөөнөтүн узартуу жөнүндө салык органынын чечиминин реквизиттери көрсөтүлөт.

(Кыргыз Республикасынын 2023-жылдын 3-апрелиндеги № 78, 2026-жылдын 6-августундагы № 145 Мыйзамдарынын редакцияларына ылайык)