Аванс берууну бербесе эмне кылуу керек

Саламатсызбы!
Бул жерде биринчи кезекте «аванс» деген эмнени түшүнүп жатканыңызды тактоо маанилүү.
Эгер сиз айдын биринчи жарымында эмгек акынын бир бөлүгүн сөзсүз түрдө «аванс» катары төлөп берүүнү талап кылып жатсаңыз, азыркы Кыргыз Республикасынын Эмгек кодексинде эмгек акы сөзсүз түрдө айына эки жолу — «аванс + айлык» болуп төлөнүүгө тийиш деген жалпы талап жок.
Эмгек кодексинин 94-беренесинин 1-бөлүгүнө ылайык, эмгек акы айына 1 жолудан кем эмес төлөнөт. Ал эми эмгек акы төлөнүүчү конкреттүү мөөнөттөр жамааттык келишимде же уюмдун ички ченемдик актыларында белгиленет.
Ошондуктан эки жагдайды айырмалоо керек:

1. Эгерде сиздин эмгек келишимиңизде, жамааттык келишимде же иш берүүчүнүн ички актыларында аванс төлөө каралган болсо, иш берүүчү ошол белгиленген тартипти жана мөөнөттү сактоого тийиш. Эмгек акы төлөө шарттары эмгек келишими, жамааттык келишим жана уюмдун ченемдик актылары менен аныкталат.
2. Эгерде документтерде аванс өзүнчө каралбаса, бирок иш берүүчү айына бир жолу белгиленген мөөнөттө эмгек акыны толук төлөп жатса, кызматкердин жөн гана өтүнүчү боюнча айлыктын бир бөлүгүн алдын ала берүүгө иш берүүчү милдеттүү деп айтууга негиз жок.

Ошондуктан кадрлар бөлүмүнөн же бухгалтериядан сиздин эмгек келишимиңизди жана эмгек акы төлөө жөнүндө ички жобону карап чыгууну сунуштайм. Ал жерде айлык кайсы күнү жана аванс каралган-каралбаганы көрсөтүлүшү керек.
Эгер аванс же эмгек акы төлөө мөөнөтү документтерде белгиленип, бирок иш берүүчү аны бузуп жатса, иш берүүчүгө жазуу жүзүндө арыз бериңиз. Натыйжа болбосо, эмгек мыйзамдарынын сакталышын көзөмөлдөгөн ыйгарым укуктуу мамлекеттик органга же сотко кайрылууга болот.
Мындан тышкары, эмгек акынын же башка тиешелүү төлөмдүн белгиленген мөөнөтү бузулса, Эмгек кодексинин 94-беренесинин 4-бөлүгүнө ылайык иш берүүчү кечиктирилген ар бир календардык күн үчүн төлөнбөгөн сумманын 0,25% өлчөмүндө кошумча төлөм төлөөгө милдеттүү.
Жыйынтык: иш берүүчү «аванс» деген аталыштагы төлөмдү бардык кызматкерлерге сөзсүз берүүгө милдеттүү деген жалпы норма жок. Негизги талап — эмгек акы айына кеминде бир жолу жана белгиленген мөөнөттө төлөнүшү керек. Сиздин учурда аванс талап кылууга укук бар-жогун аныктоо үчүн эмгек келишимиңиздеги жана иш берүүчүнүн ички документтериндеги эмгек акы төлөө тартибин карап чыгуу керек.

Урматтоо менен,
Муратбек Азимбаев
720060, Бишкек шаары, Арстанбек Дуйшеев көчөсү, 8/1
Тел.: +996 700 987794; +996 776 987794; +996 550 987794
WhatsApp, Telegram, Signal
Электрондук почта: muratbeka@gmail.com
LinkedIn: https://www.linkedin.com/in/muratbek-azimbaev-91111a4a/
X (Twitter): @MuratbekAz
ӨТӨ МААНИЛҮҮ! Оң жактагы жогорку бурчта жайгашкан кызыл түстөгү «Дисклеймер» гипершилтемесин басып, дисклеймер менен сөзсүз таанышып чыгыңыз.