84-статья. Балдарды тарбиялоо менен байланышкан иштер боюнча соттун чечимдерин аткаруу
Булагы: КР Юстиция министрлигинин мыйзам актыларынын базасы
Жаңыртылды: 06.11.2026
IV БӨЛҮМ АТА-ЭНЕЛЕР МЕНЕН БАЛДАРДЫН УКУКТАРЫ ЖАНА МИЛДЕТТЕРИ›13-Глава Ата-энелердин (аларды алмаштырган адамдардын) укуктары менен милдеттери
Кыргыз Республикасынын Үйбүлө кодексинин 84-статьясы, 17.07.2025 редакциясы.
1. Балдарды тарбиялоо менен байланышкан иштер боюнча соттун чечимдерин аткаруу соттук аткаруучу тарабынан аткаруу өндүрүшү жөнүндө мыйзамдарда белгиленген тартипте жүргүзүлөт.
Эгерде ата-эненин бири (баланы көзөмөлдөп турган башка адам) соттун чечимин аткарбаса, ага карата жоруктар жөнүндө мыйзамдарда каралган чаралар колдонулат.
2. Баланы алып коюу жана аны башка адамга (адамдарга) берүү менен байланышкан чечимдерди зордоп аткартуу балдарды коргоо боюнча ыйгарым укуктуу мамлекеттик органдын аймактык бөлүмдүн милдеттүү түрдө катышуусу жана бала берилип жаткан адамдын (адамдардын) катышуусу менен, ал эми зарыл болгон учурларда ички иштер органдарынын өкүлдөрүнүн катышуусу менен жүргүзүлөт.
Баланын кызыкчылыктарына залака келтирбестен баланы алып коюу жөнүндө соттун чечимин аткарууга мүмкүнчүлүк болбогондо соттун аныктамасы боюнча бала тарбиялоо мекемесине, дарылоо мекемесине, калкты социалдык жактан коргоо мекемесине же ушуга окшогон башка мекемелерге убактылуу жайгаштырылышы мүмкүн.
(КР 2020-жылдын 17-августундагы № 135 Мыйзамынын редакциясына ылайык)