29-берене. Капиталдык салымдар
Булагы: КР Юстиция министрлигинин мыйзам актыларынын базасы
Жаңыртылды: 06.11.2026
IV БӨЛҮМ. БЮДЖЕТТИК ИНВЕСТИЦИЯЛАР›5-глава. Бюджеттик инвестициялар
Кыргыз Республикасынын Бюджеттик кодексинин 29-беренеси, 14.10.2025 редакциясы.
1. Капиталдык салымдар - бул төмөнкүдөй негизги фонддорду түзүүгө жана калыбына келтирүүгө багытталган каражаттар:
1) жаңы обьекттерди куруу, долбоорлоо-чалгындоо иштерин реконструкциялоо, капиталдык оңдоо жана иштеп чыгуу;
2) мамлекеттик (муниципалдык) органдарды техникалык жабдуу;
3) машиналарды, жабдууларды жана башка техникаларды сатып алуу.
2. Капиталдык салымдар түрүндө ишке ашырылуучу республикалык бюджеттен каржылануучу инвестициялык долбоорлордун тизмегин түзүү белгиленген критерийлерге ылайык ыйгарым укуктуу мамлекеттик орган тарабынан, ал эми жергиликтүү бюджеттерден каржылануучулар - жергиликтүү өз алдынча башкаруунун аткаруучу органы тарабынан аныкталат.
Ыйгарым укуктуу мамлекеттик орган республикалык бюджеттен каржылануучу курулуш, капиталдык оңдоо жана реконструкциялоо объекттеринин тизмегин республикалык бюджет жөнүндө мыйзамды бекиткенден кийин бир айдан кечиктирбестен бекитет жана маалыматты Жогорку Кеңештин тармактык комитетине жиберет.
3. Капиталдык салымдардын жалпы көлөмү бюджет жөнүндө ченемдик укуктук акты менен аныкталат.
(КР 2022-жылдын 18-январындагы № 2, 2025-жылдын 18-апрелиндеги № 77 Мыйзамдарынын редакцияларына ылайык)