23-статья. Юридикалык жактарды жана жекече ишкерлерди, баалуу кагаздар эмиссиясын мамлекеттик каттоо, каттоону жүргүзүүчү мамлекеттик органга, ошондой эле банкроттук жөнүндө иштер боюнча мамлекеттик органга маалымдоо

1. Мамлекеттик реестрге тийиштүү жазууларды киргизүү үчүн администратор дайындалгандан тартып үч күндүк мөөнөттө юридикалык жактарды жана жекече ишкерлерди, баалуу кагаздар эмиссиясын мамлекеттик каттоо, каттоочу мамлекеттик органдарга, ошондой эле банкроттук жөнүндө иштер боюнча мамлекеттик органга жазуу жүзүндө билдирүү жиберүүгө милдеттүү. Билдирүү төмөнкү учурларда:

1) жүргүзүлгөн жол-жобону жана администратор тууралу маалыматтарды көрсөтүү менен карыз тарапты банкрот деп таанууда (жарыялоодо) жана банкроттук процесси башталганда;

2) жүргүзүлүп жаткан банкроттук процессинин жол-жобосун башка жол-жобого айландырууда;

3) банкроттук процессинде жүргүзүлгөн жол-жоболорду аяктаганда;

4) банкроттук процесси аяктаганда жиберилет.

2. Банкроттук процесси аяктаган учурда мамлекеттик реестрде карыз тараптын банкроттугу тууралу жазуу жок кылынат.

3. Юридикалык жактын карыз тарабын жоюу менен банкроттук процессин аяктоо учурунда бул карыз тарап реестрден алынып ташталат жана анын иш-аракети токтотулат.

4. Жекече ишкер сот тарабынан банкрот деп таанылган учурдан тартып жекече ишкер катары анын катталышынын күчү жоголот.

5. Юридикалык жактарды жана жекече ишкерлерди каттоону жүргүзүүчү мамлекеттик органдын ушул статьяда аталган иш-аракеттери администратордун тийиштүү билдирүүсү алынган күндөн тартып жети күндүн ичинде жасалууга тийиш.

(КР 1998-жылдын 30-декабрындагы № 160, 2002-жылдын 17-июнундагы № 102, 2005-жылдын 10-августундагы № 146, 2015-жылдын 20-апрелиндеги № 87 Мыйзамдарынын редакцияларына ылайык)