22-статья. Карыз тарапты банкрот деп таануунун (жарыялоонун) кесепеттери

1. Карыз тарапты сот же соттон тышкаркы тартипте банкрот деп табуу (жарыялоо) жөнүндө чечим кабыл алынгандан тартып:

1) карыз тараптын бардык карыз милдеттенмелерин төлөө мөөнөттөрү башталды деп эсептелет, эгерде алар мурда башталбаса;

2) карыз тараптын бардык карыз милдеттенмелери боюнча айып төлөмдөрдү (айыптарды, туум-айыптарды) жана пайыздарды эсептөө токтотулат;

3) банкроттук процесси башталганда эсептелген айып төлөмдөрдү (айып, туум-айып) жана пайыздар, ушул Мыйзамга ылайык төлөнүүгө жатат;

4) карыз тараптын финансылык абалы тууралу маалыматтар жашыруун мүнөздөгү болбосо, коммерциялык жашыруун сыр болуп эсептелген маалыматтардын катарына кириши токтотулбайт, банктык сырды түзүүчү маалыматтарды кошпогондо;

5) карыз тараптын мүлкүн ээликтен ажыратууга байланышкан, болбосо анын мүлкүн үчүнчү жакка берүүгө алып келүүчү бүтүмдөрдү, ушул Мыйзам менен орнотулган тартипте гана жасоого жол берилет;

6) карыз тараптын карыздарын төлөө боюнча соттук жана башка чечимдерди аткарууга жана анын активдерин камакка алууга, ошондой эле карыз тараптын милдеттенмелерин аткарууга мажбур кылууга багытталган иш-аракеттер токтотулат;

7) банкроттук процессинин чегинде гана карыз тарапка мүлктүк мүнөздөгү бардык талаптар коюлушу мүмкүн;

8) күрөө менен камсыз болгон кредитор, ушул Мыйзамга ылайык администраторго өз талабын коюуга жана талаптарынан канааттандыруу алууга укуктуу.

2. Эгерде кредиторлор менен макулдашууда башкача айтылбаса, карыз тарап кредиторлор менен биргелешкен чечим боюнча өзүнүн банкроттугу тууралу жарыялоодо ушул статьянын 1-пунктунун эрежелери колдонулат.

(КР 1998-жылдын 30-декабрындагы № 160, 2002-жылдын 17-июнундагы № 102, 2002-жылдын 17-июнундагы № 103, 2015-жылдын 20-апрелиндеги № 87 Мыйзамдарынын редакцияларына ылайык)