131-статья. Камсыздандыруу уюмун сот катышпаган тартипте атайын администрациялоо
Булагы: КР Юстиция министрлигинин мыйзам актыларынын базасы
Жаңыртылды: 06.11.2026
15-ГЛАВА КАМСЫЗДАНДЫРУУ УЮМДАРЫНЫН БАНКРОТТУГУ
Кыргыз Республикасынын Мыйзамынын 131-статьясы, 29.10.2025 редакциясы.
1. Атайын администрациялоо жол-жобосун сот катышпаган тартипте козгоо жөнүндө чечим кабыл алынган учурда камсыздандыруу уюму Кыргыз Республикасынын камсыздандыруу көзөмөлү боюнча мамлекеттик башкаруу органына билдирип жана ага камсыздандыруу иш-аракетин жүргүзүүгө лицензиясын чакырып алуу жөнүндө арыз менен кайрылууга тийиш. Лицензияны чакырып алуу тартиби лицензиялоо боюнча ченемдик укуктук актылар менен белгиленет.
2. Ушул Мыйзамдын 29-статьясынын 1-пунктунда каралган учурларда карыз тарапка ыктыярдуу түрдө атайын администрациялоо жол-жобосун баштоо талабы менен бир эле учурда кайрылуу менен кредиторлор Кыргыз Республикасынын камсыздандыруу көзөмөлү боюнча мамлекеттик башкаруу органына да камсыздандыруу уюмунун лицензиясын чакырып алуу жана ага карата атайын администрациялоо жол-жобосун козгоо жөнүндө арыз менен кайрыла алышат.
3. Кыргыз Республикасынын камсыздандыруу көзөмөлү боюнча мамлекеттик башкаруу органы 7 күндүк мөөнөттө кредиторлор тарабынан берилген арызды карап чыгат жана төмөнкүдөй чечимдердин бирин чыгарат:
а) лицензияны чакырып алуу жана камсыздандыруу уюмун сот катышпаган тартипте атайын администрациялоо жол-жобосун козгоо жөнүндө;
б) лицензияны чакырып алуу тууралу жана камсыздандыруу уюмун банкрот деп табуу жөнүндө арыз менен сотко кайрылуу;
в) эгерде "Кыргыз Республикасындагы камсыздандыруу уюму жөнүндө" Мыйзамдын 27-статьясында каралган чараларды көрүү үчүн негиз болсо, камсыздандыруу уюмуна консервациялык статусун берүү жана лицензиянын колдонушун токтотуу жөнүндө;
г) эгерде ушул Мыйзамдын 9, 9-1 жана 11-статьясында каралган шарт жок болсо, кредиторлордун арызын четке кагуу жөнүндө.
4. Кредиторлор, ошондой эле камсыздандыруу уюму Кыргыз Республикасынын камсыздандыруу көзөмөлү боюнча мамлекеттик башкаруу органынын чечимине сотто тиешелүү чечим кабыл алынгандан кийин жети күндүн ичинде даттанууга укуктуу. Даттануу тартиби банкроттук боюнча башка ченемдик укуктук актыларда аныкталат.
5. Кыргыз Республикасынын камсыздандыруу көзөмөлү боюнча мамлекеттик башкаруу органы тарабынан кредиторлордун арызын кароо жана чечим чыгаруу ушул Мыйзамда каралган башка чараларды көрүү үчүн тоскоолдук келтирбейт.