222-берене. Атайын тергөө аракеттерин жүргүзүүнүн мөөнөттөрү
Булагы: КР Юстиция министрлигинин мыйзам актыларынын базасы
Жаңыртылды: 02.11.2026
VII БӨЛҮМ›31-глава. Атайын тергөө аракеттери
1. Атайын тергөө аракетин жүргүзүү жөнүндө тергөө судьясынын токтомунда аны өткөрүү мөөнөтү көрсөтүлөт. Ушул Кодекстин 220-беренесинин 1-3, 5, 6-пункттарында каралган атайын тергөө аракети кылмыш иштин тергөө мөөнөтүндө, бирок 2 айдан ашпаган мөөнөттө жүргүзүлөт. Ушул Кодекстин 219-беренесинин 4-бөлүгүнүн экинчи жана үчүнчү абзацтарында каралган негиздер боюнча атайын тергөө аракеттери издөөдө жүргөн адамдар кармалганга чейин жүргүзүлөт.
2. Өзгөчө учурларда тергөөчүнүн өтүнүчү боюнча мөөнөт ар бир жолу 2 айга чейинки мөөнөткө узартылышы мүмкүн. Бир жылдан ашык мөөнөткө узартууга жол берилбейт.
3. Атайын тергөө аракеттери сутканын кайсы гана мезгилинде болбосун жана аны жүргүзүүнүн бардык мөөнөтүндө үзгүлтүксүз жүргүзүлүшү мүмкүн.
4. Эгерде атайын тергөө аракеттерин жүргүзүү зарылдыгы жоголсо, тергөөчү аны андан ары жүргүзүүнү кыскартуу жөнүндө чечим кабыл алууга милдеттүү.
(КР 2025-жылдын 9-августундагы № 193 Мыйзамынын редакциясына ылайык)