318-9-берене. Аксакалдар сотунун чечимдерине даттанууну кароо
Булагы: КР Юстиция министрлигинин мыйзам актыларынын базасы
Жаңыртылды: 02.11.2026
II БӨЛҮМ. БИРИНЧИ ИНСТАНЦИЯ СОТУНДАГЫ ӨНДҮРҮШ›361-глава. Нотариустун актыларын, жасалган нотариалдык аракеттерди
1. Даттануу ал сотко келип түшкөн учурдан тартып отуз күндүн ичинде, аксакалдар сотунда ишти кароого катышкан адамдардын катышуусу менен сот тарабынан каралат.
2. Ушул берененин 1-бөлүгүндө көрсөтүлгөн, сот жыйналышынын убактысы жана орду жөнүндө талаптагыдай кабарландырылган жактардын кимдир бирөөсү сот жыйналышына келбей коюшу арызды кароого тоскоолдук болуп саналбайт.
3. Сот ишти кароодо өз алдынча талаптары бар тарап же үчүнчү жак болуп саналган жаран каза болгондугуна байланыштуу, ошондой эле тарап аракетке жөндөмсүз деп таанылгандыгына же аракетке жөндөмсүз деп таанылган адамдын мыйзамдуу өкүлүнүн жоктугуна байланыштуу аксакалдар сотунун даттанылуучу чечиминин аракетин токтотуп турууга укуктуу.
4. Сот даттанууда баяндалган жүйөлөр жана процесстин катышуучуларынын түшүндүрмөлөрү, берилген далилдер жана иште болгон башка материалдар менен чектелбестен, талашты туура чечүү үчүн аксакалдар сотунун даттанылуучу чечими боюнча иш жүзүндөгү жагдайларды изилдейт.
(КР 2025-жылдын 6-августундагы № 190 Мыйзамынын редакциясына ылайык)