Кыргызстанда чет элдиктер үчүн милдеттүү түрдө каттоо киргизилүүдө

БИШКЕК, 2-ноябрь – Sputnik.

Тышкы иштер министрлиги чет мамлекеттердин жарандарына өлкөдө беш күндөн ашса каттоого туруу керектигин эскертет, деп билдирди ведомствонун басма сөз кызматы. Буга 4-ноябрдан тарта Кыргызстан визалык, жөнөкөйлөштүрүлгөн жана визасыз режимдерди орноткон чет мамлекеттердин жарандары үчүн каттоону киргизүүнү караган “Тышкы миграция жөнүндө” мыйзамдын күчүнө кириши түрткү болду. Күчүнө кирген эл аралык келишимдин жоболору колдонулган өлкөлөрдүн жарандары өзгөчө болуп калат. Мындай келишим учурда Орусия менен бар, анын жарандары Кыргызстандын аймагында 30 күн каттоосуз жүрө алат. Ушундай эле документке Казакстан менен да кол коюу күтүлүүдө.

Ошол эле учурда 4-ноябрга чейин өлкөгө киргендер документте мурда каралгандай, каттоодон бошотулат. “Тышкы миграция жөнүндө” мыйзам Кыргыз Республикасынын аймагына беш жумушчу күндөн ашык мөөнөткө келгендерге таасирин тийгизет. Чет өлкөлүк жарандарды каттоо алардын иш жүзүндө жашаган жери боюнча Мамлекеттик каттоо кызматынын алдындагы Калкты жана жарандык абалдын актыларын каттоо департаментинин аймактык органдары тарабынан жүргүзүлөт.

Каттоодон өтүү үчүн белгиленген үлгүдөгү катты (петицияны), паспортту же чет өлкөлүк жарандын инсандыгын күбөлөндүргөн аны алмаштыруучу документти жана анын көчүрмөсүн, мамлекеттик алым төлөнгөндүгү жөнүндө квитанцияны тапшыруу керек. Чет элдик жаран мыйзамды бузса мыйзам боюнча административдик жоопкерчиликке тартылат (10 миң сом айып). Кыргыз Республикасынын аймагындагы чет мамлекеттердин дипломатиялык өкүлчүлүктөрүнүн, консулдук мекемелеринин жана эл аралык уюмдардын кызматкерлери Консулдук кызмат департаментинде каттоодон өтүүгө тийиш.

булак