21-берене. Мобилизациялык резервдин жыйындарына чакыруу

1. Жыйырма эки жаштан кырк жашка чейинки курактагы, аскердик кызмат өтөбөгөн, ошондой эле альтернативдик кызмат өтөгөн жарандар, ушул Мыйзамда белгиленген тартипте мобилизациялык резервдин жыйындарынан өтүүгө укуктуу.

2. Мобилизациялык резервдин жыйындары жарандардын республикалык бюджетке толук өлчөмдө түшүүчү акчалай төгүмдү төлөөсүн карайт.

Чакыруунун жана жыйындардан өтүүнүн тартиби, ошондой эле акчалай төгүмдүн өлчөмү Кыргыз Республикасынын Министрлер Кабинети тарабынан аныкталат.

3. Акчалай салым аскер жыйындарын өтүү башталганга чейин төлөнөт.

(Абзац КР 2019-жылдын 17-майындагы № 64 Мыйзамына ылайык күчүн жоготту)

4. Мобилизациялык резервдин жыйындарына чакырылган жарандар Аскердик ант берет.

Мобилизациялык резервдин жыйындары аяктагандан кийин жаран запаска киргизилет жана биринчи категориядагы аскерге милдеттүүлөрдүн эсебине коюлат.

5. (Кыргыз Республикасынын 2023-жылдын 7-августундагы № 164 Мыйзамына ылайык күчүн жоготту)

6. Запастын биринчи категориясына каттоого алынган, жогорку билими бар, курагы 30 жашка чейинки, офицердик курамдын запастагы биринчи аскердик наамын алууну каалаган аскерге милдеттүүлөр мобилизациялык резервдин жыйындарынан запастагы офицерлерди даярдоо программасы боюнча өтүшөт.

Запастагы офицерлерди даярдоо программасы боюнча мобилизациялык резервдин жыйындары бүткөндө аскерге милдеттүүлөргө офицердик курамдын запас боюнча "кенже лейтенант" биринчи аскердик наамы ыйгарылат.

Запастагы офицерлерди даярдоо программасы боюнча мобилизациялык резервдин жыйындары Кыргыз Республикасынын Министрлер Кабинети тарабынан аныкталуучу өлчөмдө республикалык бюджетке толук көлөмдө түшүүчү акчалай төгүмдү жарандардын төлөөсүн карайт.

(Кыргыз Республикасынын 2016-жылдын 30-июлундагы № 158, 2017-жылдын 1-декабрындагы № 196 (1) , 2019-жылдын 17-майындагы № 64 , 2019-жылдын 18-июлундагы № 94, 2021-жылдын 15-январындагы № 6, 2023-жылдын 7-августундагы № 164 , 2026-жылдын 20-февралындагы № 17 Мыйзамдарынын редакцияларына ылайык)