27-11-статья. Карыз тарапты банкрот деп таануу тууралу арызды кабыл алуу

1. Карыз тарапты банкрот деп таануу тууралу арызды кабыл алуу жөнүндө маселе судья тарабынан жекече чечилет.

2. Сот ушул Мыйзамда каралган талаптарды сактоо менен берилген арызды соттук иш өндүрүшүнө кабыл алууга милдеттүү.

3. Арызды кабыл алуу тууралу сот аныктама чыгарат, ал аталган арыз сотко келип түшкөн күндөн тартып, беш күндөн кеч эмес арыз берүүчүгө жана карыз тарапка жөнөтүлөт.

4. Арызды кабыл алуу тууралу аныктамада судья соттук тергөөгө ишти даярдоо аракетин, соттун заседаниесинде ишти тергөөгө дайындоону, аны өткөрүү убактысы менен ордун көрсөтөт.

5. Кароого арызды кабыл алуу жөнүндө аныктама чыгарылган күндөн тартып, ишти кароонун учурунда карыз тараптын карыздарын төлөөгө жана активдерин камакка алууга тийиштүү бардык соттук жана башка аракеттер токтотулат, Ушул пункттун жоболору, ушул Мыйзамдын 21-статьясынын 8-пунктунда көрсөтүлгөн жактардын укуктарына жайылтылбайт.

6. Карыз тараптын өзүнө тийиштүү мүлктү бөлүштүрүшү боюнча чектөөлөр банкроттук процессинин чегинде гана коюлушу мүмкүн.

7. Арызды кабыл алуу тууралу аныктамалар даттанууга жатпайт.

(КР 1998-жылдын 30-декабрындагы № 160, 2009-жылдын 24-июлундагы № 247 Мыйзамдарынын редакцияларына ылайык)