290-берене. Соттук териштирүүгө аралыктан катышуу
Булагы: КР Юстиция министрлигинин мыйзам актыларынын базасы
Жаңыртылды: 02.11.2026
IX БӨЛҮМ›41-глава. Соттук териштирүүнүн жалпы шарттары
1. Сот ишке катышкан жактардын өтүнүчү боюнча же өз демилгеси менен жабырлануучуну, күбөнү, экспертти, адисти соттук отурумда видеоконференцбайланыш режиминде суракка алууга (аралыктан суракка алууга) укуктуу, ал жөнүндө жүйөлөнгөн токтом (аныктама) чыгарат.
Видеоконференцбайланыш режиминде аралыктан суракка алуу жөнүндө соттун токтому (аныктамасы) жабырлануучунун, күбөнүн, эксперттин, адистин турган жери боюнча сотко аткаруу үчүн жөнөтүлөт.
2. Жаза-аткаруу тутумунун мекемесинде, ошондой эле улуттук коопсуздук органдарынын тергөө изоляторунда кармалган айыпталуучунун (соттолгондун) соттук териштирүүдө катышуусу видеоконференцбайланыш режиминде жүргүзүлөт.
Айыпталуучунун (соттолгон адамдын), анын адвокатынын же мамлекеттик айыптоочунун өтүнүчү боюнча жаза-аткаруу тутумунун мекемесинде, ошондой эле улуттук коопсуздук органдарынын тергөө изоляторунда кармалган айыпталуучунун (соттолгон адамдын) катышуусу соттук отурум өтүүчү жерде камсыз кылынат.
(КР 2024-жылдын 16-февралындагы № 49, 2025-жылдын 19-майындагы № 96 Мыйзамдарынын редакцияларына ылайык)