30-1-статья. Карыз тарап аркылуу чакырылган кредиторлордун чогулушуна кредиторлордун катышпагандыгынын кесепети

1. Сот катышпаган атайын администрациялоо жөнүндө маселени чечүү үчүн карыз тарап аркылуу тиешелүү түрдө чакырылган чогулушка кредиторлордун эч кимиси келбесе, анда:

1) сот катышпаган банкроттук процессин карыз тарапка карата баштоо жана аны банкрот деп жарыялоо, ушул Мыйзамдын 22-статьясында каралган негиздер колдонулат;

2) атайын администратор катарында карыз тарапка сунуш кылган адам дайындалды деп эсептелет.

2. Атайын администратор ушул Мыйзамда каралган милдеттерди аткарат. Мындан тышкары ал кредиторлор чогулушун өткөрүү үчүн дайындалган датадан кийин он күндүн ичинде аны атайын администратор катарында бекитүү жөнүндө сотко арыз менен кайрылууга милдеттүү.

3. Арыз карыз тарап жайгашкан жердеги сотко машинкада басылган текст менен жазуу жүзүндө берилет. Арызга атайын администратор кол коет. Арызда төмөнкүлөр:

1) арыз берилген соттун аталышы;

2) карыз тараптын аталышы, анын почталык дареги;

3) бардык ага белгилүү кредиторлор, анын ичинде күрөө менен камсыз болгондор жана алардын талаптарынын суммасы;

4) карыз тарапты банкрот деп табуу, атайын администратор катарында карыз тарап сунуш кылган адамды бекитүү жана сот катышпаган атайын администрациялоо жол-жобосун дайындоо жөнүндө өтүнүч;

5) карыз тараптын активдеринин болжолдуу наркы жөнүндө маалымат;

6) атайын администратордо болгон өтүнүч;

7) тиркелүүчү документтердин тизмеси көрсөтүлүүгө тийиш.

4. Ушул Мыйзамдын 9-1-статьясында белгиленген карыздын минималдуу суммасы жөнүндө талап, атайын администраторго арыз берүүдө колдонулбайт.

5. Кредиторго арыздын көчүрмөсүн жана ага тиркелген документтерди жиберүү талап кылынбайт.

6. Арызга төмөнкүдөй документтер:

1) уюштуруу документтеринин көчүрмөсү;

2) юридикалык жак катарында мамлекеттик каттоо тууралу күбөлүктүн көчүрмөсү;

3) акыркы отчеттук датага бухгалтердик баланс же аны алмаштыруучу документтер;

4) сот катышпаган атайын администрациялоо процессин козгоо жөнүндө карыз тараптын катышуучуларынын чечиминин көчүрмөсү;

5) кредиторлордун эч кимиси чогулушка катышкан жок деген белги коюлган чогулуштун протоколунун көчүрмөсү;

6) атайын администратордун квалификациясын жана анын ушул Мыйзамдын 8-статьясында белгиленген талапка жооп бере тургандыгын ырастоочу документтер;

7) карыз тараптын чогулушту тиешелүү чакырышын ырастаган документтер;

8) карыз тараптын кредиторлордун талабын толук канааттандырууга жөндөмсүздүгүн, ошондой эле карызынын бар экендигин ырастоочу документтер;

9) карыз тарапты банкрот деп табуу жөнүндө сотко арыз берүүдө ал төлөй турган мамлекеттик алымды жана почталык чыгымдарды төлөгөндүгүн ырастоочу документтер тиркелет.

7. Сот арыз келип түшкөн учурдан тартып 14 күндүн ичинде чечим кабыл алууга милдеттүү. Көрсөтүлгөн мөөнөттүн ичинде кредитор атайын администратордун иш-аракетине сотко даттанууга укуктуу.

8. Сот укуктуу:

1) эгерде кредиторлор тарабынан негиздүү каршылык болбосо жана ушул Мыйзамдын бардык талаптары сакталса, карыз тарапты банкрот деп жарыялоо жана соттон тышкары тартипте атайын администрациялоо жол-жобосун ушул статьяга ылайык кабыл алынган кредиторлордун чогулушунун чечимин бекитүүгө;

2) эгерде ушул Мыйзамдын 27-23-статьясынын 1-пунктунда каралган жагдайлар болсо, карыз тарапты банкрот деп жарыялоо жөнүндө кредиторлор чогулушунун чечимин жана ушул статьяга ылайык кабыл алынган соттон тышкаркы тартипте атайын администраторду дайындоо жөнүндө жана атайын администрациялоо жол-жобосу тууралу чечимди бекитүүдөн баш тартууга. Эгерде дайындалган атайын администратор ушул Мыйзамда белгиленген талаптарга жооп бербесе, сот банкроттук жөнүндө иштер боюнча мамлекеттик орган сунуш кылган талапкерди бекитүүгө.

(КР 1998-жылдын 30-декабрындагы № 160, 2002-жылдын 17-июнундагы № 102 Мыйзамдарынын редакцияларына ылайык)